Nga Lori Sina
Ah, Darkat Familjare, Darkat e Vitit të Ri - Një Spektakël i Paimitueshëm.
Darkat familjare të Vitit të Ri janë si një film që e shikon çdo vit, por skenari asnjëherë nuk ndryshon. Gjithmonë dikush vonohet, dikush tjetër kritikon ushqimin dhe pastaj fillojnë diskutimet e zakonshme: kush është martuar, kush është ndarë, kush ka bërë më shumë sukses dhe kush, për fat të keq, "nuk ka bërë gjë me jetën."
Dikush përpiqet të bëhet ambasador i
paqes duke thënë: "Mos diskutoni tani, është Vit i Ri!" Ndërsa të tjerët ndezin zjarrin duke përmendur tema delikate, sepse si mund të kalojë një darkë familjare e sidomos darka e Vitit të Ri pa dramë?
Gjithmonë ka një "ekspert" që e di më mirë se të giithë nga politika te biznesi e deri te shërimi i gripit me rakinë e hallës dhe me limonat e bahçes.
Pastaj vijnë pyetjet me spec: "Po ti kur do martohesh?","Kur do na e bësh një dasëm?", ose klasikja: "A mos ndoshta ke shtuar pak peshë se vjet sikur ishe më mirë?" (Syri kritik nuk mund të mungojë në një darkë familjare.)
Ata buzëqeshin, por gjithmonë do jetë një që e përmend: ''Epo, është me fat kjo punë!"
Por, midis gjithë këtyre skenave, mes zhurmës, të qeshurave të sinqerta, (ndonjëherë jo dhe aq) dhe debatit për të zgjedhur kanalin
televiziv, orën për fishekzjarrët, ndodh diçka
magjike. Kupton që pavarësisht çdo gjëje, çdo
ironie, çdo vërejtjeje, çdo pyetje të sikletshme, ata janë familja jote.
Dhe si çdo film klasik, përfundimi
është gjithmonë i njëjtë: Dashuria, me të gjitha
format e saj të çuditshme, gjithmonë triumfon.
Gëzuar Vitin e Ri, Familje! Pa ju, as nervat e mia s'do të kishin kuptim.
