Ilir Beqaj, ish-ministër i Shëndetësisë, është i pari zyrtar i lartë që akuzohet nga SPAK për grup kriminal
Gjykata e Posaçme orientoi SPAK që ndaj Beqajt dhe dy të pandehurve të tjerë, ish-zv.ministri i Shëndetësisë, Klodian Rjepaj dhe biznesmenit Ilir Rrapaj të ngrihen akuzat e “vjedhjes duke shpërdoruar detyrën”, dhe “grupit të strukturuar kriminal” për aferën e koncesionit të sterilizimit.
Rikualifikimi i veprave penale ndaj të pandehurve erdhi pas shqyrtimit të dosjes voluminoze në seancën paraprake.
Ish-ministri akuzohej për veprën penale të shpërdorimit të detyrës, ndërsa Klodian Rjepaj për akuzat e mashtrimit, shpërdorimit të detyrës e falsifikimit të dokumentave.
Biznesmeni Rrapaj akuzohej me herët për mashtrim e falsifikim dokumentash. Në momentin që u njoh me akuzat e reja, ku pozita e tij rëndohet ndjeshëm përballë drejtësisë, Ilir Rrapaj humbi ndjenjat në seancë.
Prokurori i posacëm Edvin Kondili u shpreh në seancë se pranon sugjerimin e gjykatës, por tha se akuzat e përpiluara prej tij në aktakuzë për të pandehurit ishin të sakta.
Në vijim të seancës u zhvilluan replika mes palëve. Prokurori kërkoi nga gjykata të saktësonte se për llogari të tij kishin vjedhur të pandehurit. “Për veten e tyre”, theksoi gjyqtarja.
Beqaj reagoi dhe kërkoi të saktësohej shuma që ai akuzohet se ka vjedhur. Për të paraqitur argumentat kundër akuzave të reja, gjykata iu la kohë të pandehurve deri në seancën e radhës që pritet të zhvillohet me 9 janar 2025.
Pozita e të pandehurve të tjerë në proces nuk ndryshoi.
Gjykata e Posacme i kujtoj prokurorisë që të hetojë rolin e zyrtarëve të Ministrinë së Financave dhe Komisionit të Prokurimeve Publike si dhe të zhvillojë hetime për Umberto Stacinin, ortak me biznesmenin Ilir Rrapaj.
Rrapaj rezulton më herët me lidhje dhe njohje me ish-ministrin Beqaj dhe ish-zv.ministrin Rrapaj. Të tre akuzohen tashmë për krijim grupi kriminal dhe vjedhje duke shpërdoruar detyrën.
Ilir Beqaj po hetohet ndërkohë për abuzime me fondet e BE-së gjatë kohës që drejtonte agjencinë SASPAK.
