Pa kaluar 5 ditë nga atentati ndaj Kevin Hajrullas, kushëririt të bossit të krimit në Vlorë, Inez Hajrulla, një ngjarje është regjistruar në Tiranë, që në pamje të parë duket se të dyja lidhen me njëra tjetrën.
Rreth mesnatës së 21 dhjetorit në katin e 9-të të një banesë, në rrugën “Sadik Petrela” ka shpërthyer një sasi tritoli.
Pas sinjalizimit, shërbimet e Policisë kanë shkuar në vendngjarje dhe kanë hapur me forcë derën. Aty kanë konstatuar se nuk kishte njeri në banesë dhe se tritoli kishte shpërthyer në ballkon.
Hetuesit kanë zbuluar se banesën e frekuentonte Bernard Sinomati, kundërshtar i përbetuar i Inez Hajrullës.
Sinomati, rezulton se e kishte marrë këtë apartament me qira 5 muaj më parë, por kur policia ka shkuar aty pas shpërthimit nuk e ka gjetur aty.
Bernand Sinomati, është vëllai i Sokol Sinomatit i njohur si Buzëderri, ish-anëtar i Bandës së Gaxhait.
Ata janë në përplasje të forta me Hajrullan, që kur ky i fundit mori drejtimin e grupit kriminal pas ekzekutimit të Edison Arizajt, i njohur si Edison Faqedjeguri.
Një vit më parë në Vlorë, u vra me snajper Gëzim Sinomati, nipi i Bernard Sinomati. Policia është duke hetuar përplasjet mes këtyre grupeve për të hedhur dritë mbi krimet tronditëse që janë shënuar ndër vite.
