Durim Bami, i njohur si “i forti i Niklës”, vijon të mbahet në paraburgim në Dubai, ku po përballet me një betejë ligjore për të shmangur ekstradimin në Shqipëri. I shpallur në kërkim ndërkombëtar nga SPAK, Bami u arrestua për herë të dytë në Emiratet e Bashkuara Arabe, pas një ndalimi të mëparshëm, kur u lirua për shkak të mungesës së një marrëveshje ekstradimi mes dy vendeve.
Sipas burimeve, Bami është ndaluar teksa ishte me familjen në qytet dhe aktualisht është duke luftuar kundër dëbimit. Ai ka marrë dosjen e SPAK përmes avokatëve, ku rezulton i akuzuar për krijim të kushteve për vrasje dhe pjesëmarrje në një grup kriminal.
Rasti i tij pritet të vendoset më 24 dhjetor në një seancë gjyqësore në Dubai. Ngjashëm me rastin e Plarent Dervishajt, i cili u deportua më parë nga Emiratet, Bami përballet me mundësinë e kthimit në Shqipëri, ku autoritetet kërkojnë ta vendosin para drejtësisë. Ndërkohë, ai mbetet gjithashtu në shënjestër të grupeve kriminale, duke e komplikuar më tej situatën e tij.
