Ish-ministri i Mjedisit, Lefter Koka, i cili po përballet me Apelin e Posaçëm për aferën e inceneratorit të Elbasanit, shpërtheu në sallën e gjyqit. Ai kërkoi pafajësi dhe theksoi se drejtësia duhet të hetojë dhe të zbulojë “peshkun e madh.”
“Ju po kërkoni të më dënoni mua si ‘peshkun e madh’. Por nuk jam unë ‘peshku i madh,’” deklaroi ish-ministri.
Koka iu kujtoi gjyqtarëve se gjithçka që deklaroi prokurori në seancë është thjesht një kallëzim i bërë nga Monika Kryemadhi. “Dëgjova prokurorin sot, dhe ky është saktësisht kallëzimi i bërë nga Monika Kryemadhi. Megjithëse ka kaluar një vit, konkluzionet e prokurorëve mbeten të njëjta,” theksoi Koka.
Më tej, ish-ministri aludoi se gjykata është nën presion, por u kërkoi gjyqtarëve që “të ngrihen në nivelin e duhur dhe të bëjnë drejtësi.”
“Përse e ndatë dosjen, që të më dënoni sa më shumë? Nuk jam unë peshku i madh. Hapni telefonin e Monika Kryemadhit. Nuk do të më gjeni mua. Aty keni ‘peshkun e madh,’” përfundoi Koka.
Ish-ministri është dënuar nga GJKKO me 6 vite e 8 muaj burgim dhe kërkon pafajësinë në Apelin e Posaçëm.
