Adriatik Lapaj në Kuvend. Ky është qëllimi kryesor, ndaj dhe ëvizja “Shqipëria Bëhet” ka depozituar një ankim zyrtar në Kolegj Zgjedhor, duke kundërshtuar vendimin e Komisionit të Ankimimeve dhe Sanksioneve (KAS), i cili i dha mandatin e deputetes në qarkun Tiranë kandidates së parë në listën e mbyllur, Ana Dajko.
Në dokumentin e dorëzuar pranë Kolegjit Zgjedhor, kjo forcë politike kërkon që mandati i deputetit t’i kalojë Adriatik Lapajt, kandidatit më të votuar përmes listës së hapur, duke u mbështetur në dorëheqjet e paraqitura nga disa prej kandidatëve më lart në listën e mbyllur.
“Shqipëria Bëhet” argumenton se vullneti i qytetarëve është shprehur qartë përmes votës preferenciale dhe se ky vullnet duhet të prevalojë mbi renditjen e paracaktuar në listë.
“Kërkojmë që të respektohet parimi themelor i përfaqësimit demokratik: vota e qytetarëve. Nuk mund të anashkalohet vota preferenciale në favor të një renditje formale që nuk pasqyron më vullnetin real të zgjedhësve,” thuhet në ankimim.
Rasti pritet të shqyrtohet nga Kolegji Zgjedhor në ditët në vijim, ndërsa vendimi mund të krijojë një precedent të rëndësishëm për mënyrën e shpërndarjes së mandateve në sistemin aktual zgjedhor.
