Ish-kryeministri Sali Berisha ka komentuar sot vrasjet e 21 Janarit, ku humbën jetën 4 protestues përballë godinës së Kryeministrisë.
Berisha i ka cilësuar këto vrasje si “krim shtetëror pa dashje”, duke sqaruar se, sipas tij, nuk kishte urdhër të drejtpërdrejtë për të qëlluar, por viktimat u vranë me armët e shtetit për shkak të një incidenti të papritur, si ricochet.
“Krimi shtetëror me dashje ka rregullat e veta, por këtu kemi të bëjmë me një krim shtetëror pa dashje. Ata u dëmshpërblyen, por nuk di nëse shumat ishin të mjaftueshme,” tha Berisha.
Ai theksoi gjithashtu përgjegjësinë e kryeministrit Edi Rama, duke theksuar se ai është përgjegjësi kryesor për ngjarjen pasi “i solli ata aty” dhe duke përmendur deklarata të ndryshme që flasin për hetim dhe axhendë politike të demonstratës.
Këto komente Berisha i bëri pas paraqitjes së tij në SPAK për aferën “Partizani”, ku ai zbaton masën e sigurisë “Detyrim paraqitje”.
Berisha u shoqërua nga avokati i tij, Genc Gjokutaj, dhe gjatë firmosjes së masës la një mesazh me shkrim drejtuar kreut të SPAK, Altin Dumanit. Në shënimin e tij, Berisha akuzoi Dumanin si “mashtrues publik i rangut më të lartë” dhe e krahasoi atë me ish-ministrin Fatmir Xhafaj, duke e përshkruar si “avokatin kryesor të krimit elektoral”.
“Altin Troplini alias Dumani është një mashtrues publik i rangut më të lartë, i njëjtë me Ramaduron. Deklaroi se paditë e sjella në SKAP, me dhjetëra e dhjetëra padi për krim elektoral, pati amoralitetin e plotë të mashtrojë shqiptarët se këto padi nuk kishin prova.
E garantoj se do të përgjigjet para shqiptarëve për këtë mashtrim publik dhe se parlamenti, opozita do të nisë punën pikërisht me zbërthimin e këtij mashtrimi publik.
