Kryeministri Edi Rama ka reaguar sot përmes një postimi në rrjetet sociale lidhur me debatet që kanë shpërthyer rreth draftit të ri të Kodit Penal, i cili ka ngjallur shqetësime dhe reagime për kufizim të lirive. Në reagimin e tij, Rama ka zgjedhur një ton ironik ndaj atyre që kanë kritikuar draftin, duke i cilësuar si të ekzagjeruar dhe të orientuar nga interesa politike.
“Të alarmuarit nga drafti i Kodit të ri Penal dhe gojëmbyllja me ligj e forcave liridashëse politike dhe mediatike, mbase duhet të kujdesen që të mos ekspozohen shumë në diell,” – shkruan Rama, duke shtuar se ky është një propozim i ekspertëve të fushës, i cili ka si qëllim të nxisë një debat të hapur dhe demokratik.
Ai thekson se drafti është prezantuar për të mbledhur mendime dhe sugjerime nga publiku, dhe nuk përbën një vendim përfundimtar apo veprim autoritar.
“Drafti i ekspertëve të nderuar të fushës është prezantuar publikisht pikërisht për të mbledhur në mënyrën më demokratike dhe transparente të mundshme të gjitha opinionet rreth tij,” – shkruan Kryeministri.
Duke përmbyllur reagimin e tij, Rama thekson se problemi i vërtetë i lirisë në Shqipëri, sipas tij, nuk është drafti apo një regjim imagjinar, por keqpërdorimi i lirisë nga një pjesë e opinionit publik dhe mediave.
“Hëpërhë problemi më serioz që ka liria në Shqipëri nuk është as regjimi, as drafti i kodit të ri jo e jo, po masa domethënëse e atyre që e përdorin lirinë vetëm për të bërë sherr e shamata për mungesën e saj????”, – përfundon Rama.
