Prej dy ditësh, kryeministri, drejtori i përgjithshëm i policisë, prokuroria, gjykata dhe media janë përfshirë në një debat të ethshëm për përgjegjësitë e ngjarjes së rëndë në Pogradec ku humbi jetën Egli Proga.
Ngjarja që dy ditët e para kaloi thuajse në heshtje prej organeve përgjegjëse u rikthye në qendër të debatit politik dhe mediatik për t’u shndërruar në “pataten e nxehtë” që gjithseci përpiqet ta largojë nga duart.
Kryeministri dhe drejtori i përgjithshëm i policisë nxituan të fajësojnë prokurorinë dhe median. Prokuroria policinë dhe gjykatën. Ndërsa kjo e fundit të gjithë bashkë.
I vetmi që nuk ka reaguar deri më sot është ministri i brendshëm Ervin Hoxha. Ngjarje të tilla, si ajo e Klodian Rashës e kanë çuar përgjegjësinë edhe tek ministri i brendshëm. Që në këtë rast thjesht ka heshtur publikisht ose në prapaskenë ka lëvizur fijet e padukshmë të drejtuesve të policisë së shtetit.
A është ngjarja e Pogradecit kaq e vështirë për t’u zbardhur? Faktet tregojnë se me pak përpjekje gjithçka del në dritë shumë shpejt.
A është vrasja e Egli Hoxhës një krim i momentit apo pas saj fshihen dhe gjëra të tjera. Kush dhe pse hodhi në media tezën e gjobvënies?
Kujt i intereson që përgjegjësia të shkojë vetëm tek policia e shtetit dhe tek drejtuesit e saj? Dhe kush mund të jetë investuar direkt që rrokadën në policinë e shtetit pas emërimit të Ervin Hoxhës ta realizojnë duke bërë kurban Met Rrumbullakun?
Këto pyetje mbeten pa përgjigje në kushtet kur hetimet paër vrasjen janë duke u kryer këtë herë me presionin e madh të publikut dhe medias për të zbardhur të vërtetën e vrasjes në Pogradec. Por zhvillimet ne strukturat e rendit pasi të kalojnë disa ditë do të tregojnë qartë nëse vrasja e Egli Progës ishte një ngjarje e trajtuar pa kujdes nga policia apo një kurth për të justifikuar ndryshimet në radhët e policisë së shtetit që me gjasë do të ndodhin në shtator.
