Në legjislaturën aktuale (2021-2025), 21 deputetë kanë dorëzuar ose humbur mandatin parlamentar, ndërsa tre të tjerë pritet të përballen me të njëjtin fat në muajt e ardhshëm. Ky është përfundimi i një raporti të publikuar nga Instituti i Studimeve Politike (ISP), i cili ngre shqetësime mbi integritetin e përfaqësimit politik në vend.
Sipas raportit, 13 nga këta deputetë janë të Partisë Socialiste (PS), 10 të Partisë Demokratike (PD), dhe 1 i Partisë Socialdemokrate (PSD). Më shumë se 160 mijë vota, që përbëjnë rreth 10% të votave të përgjithshme të zgjedhjeve të vitit 2021, nuk kanë më përfaqësim në Kuvend.
Arsyet për dorëzimin e mandateve janë të ndryshme: disa deputetë kanë dhënë dorëheqje menjëherë pas zgjedhjes për arsye hetimore nga SPAK, për shkak të ndodhjes në listën e zezë amerikane, ose për arsye personale. Të tjerë kanë dhënë dorëheqje për t’u rikthyer në bizneset private, ndërsa disa janë detyruar të largohen pas skandaleve personale apo hetimeve dhe dënimeve nga sistemi i drejtësisë.
Raporti i ISP-së ngre alarmin për mungesën e një kontrate të qartë sociale midis të zgjedhurve dhe zgjedhësve. Përfshirja e individëve me rekorde kriminale apo të përfshirë në skandale korruptive në listat zgjedhore, sipas raportit, synon përfitime të votave klienteliste, duke injoruar standardet e integritetit politik dhe moral.
