Kuvendi i Shqipërisë do të zhvillojë sot seancën plenare, ku mazhoranca synon të vazhdojë punën pa 24 deputetët e opozitës, të përjashtuar pas incidentit të 30 shtatorit. Ndërkohë, opozita ka paralajmëruar mosbindje civile dhe aksione protestuese.
Në rendin e ditës për sot është planifikuar një interpelancë me ministren e Kulturës dhe Turizmit, Mirela Kumbaro, thirrur nga deputeti Agron Shehaj. Po ashtu, Kuvendi do të diskutojë raportin vjetor për KLSH-në dhe disa projektligje të tjera.
Partia Demokratike ka mbledhur grupin parlamentar në orën 08:30 për të vendosur strategjinë e saj. Ndërkohë, Garda e Republikës ka shtuar masat e sigurisë rreth Kuvendit, duke vendosur një gardh metalik për të parandaluar tensionet e mundshme.
