Edhe pse një pjesë e deputetëve të mazhorancës nuk ishin dakord me projektligjin për legalizimin e kanabisit, qeveria ka ndërmarrë hapin e radhës, duke miratuar sot procedurën dhe mënyrën e përdorimit të të ardhurave të Agjencisë Kombëtare të Kontrollit të Kanabisit.
Sipas vendimit, të ardhurat nga tarifa e licencës për subjektet aplikante derdhen plotësisht (100%) në buxhetin e shtetit. Ndërkohë, të ardhurat nga tarifa vjetore për aktivitetin e subjekteve të licencuara do të shpërndahen në këtë mënyrë: 70% në buxhetin e shtetit dhe 30% do të përdoren nga Agjencia.
Kjo nismë, që në fillimet e saj ka ngjallur shumë debate në opinionin publik dhe brenda vetë mazhorancës. Deputetët Pandeli Majko dhe Fatmir Xhafaj kanë qenë kritikë ndaj saj, duke refuzuar ta votojnë në Komisionin e Ligjeve. Edhe Erion Braçe ka shprehur shqetësime, veçanërisht për ndikimin që legalizimi mund të ketë në fuqinë punëtore të sektorit të bujqësisë, i cili tashmë po përballet me mungesë të punëtorëve.
Megjithatë, kundërshtimi i deputetëve socialistë ka qenë i përkohshëm; kur e kuptuan se kryeministri ishte i vendosur për legalizimin, kundërshtimet u zhdukën. Tani që nisma po bëhet realitet, nuk ka asnjë reagim publik nga ana e tyre. Nga ana tjetër, edhe përfaqësuesit e opozitës po qëndrojnë në heshtje, pa bërë asnjë deklaratë kundërshtuese.
Ekspertët e ekonomisë kanë shprehur shqetësime për mungesën e transparencës nga kompanitë që do të licencohen, si dhe për rrezikun e nxitjes së kultivimit të paligjshëm të kanabisit. Këto shqetësime bazohen edhe në faktin se Shqipëria ka pasur vështirësi në kontrollin e territorit, duke qenë se kanabisi ka qenë një nga bimët më të kultivuara në 20 vitet e fundit.
