Një zjarr me përmasa të mëdha ka përfshirë mbrëmjen e kësaj të premteje qytetin e Himarës, duke krijuar një situatë të vështirë për banorët dhe forcat zjarrfikëse.
Flakët janë përhapur me shpejtësi në kodrat pranë lagjes “1 Maji”, duke iu afruar zonave të banuara dhe duke rrezikuar edhe sipërfaqet me pemëtari që ndodhen në këtë pjesë të qytetit.
Përballë situatës së krijuar, në terren kanë dalë edhe banorë të Himarës, të cilët po ndihmojnë forcat zjarrfikëse në përpjekje për të izoluar dhe vënë nën kontroll flakët.
Ndërhyrja po vështirësohet nga era e fortë, e cila favorizon përhapjen e zjarrit dhe e bën më të vështirë punën e ekipeve në terren. Për këtë arsye, zjarrfikësit kanë kërkuar edhe mbështetjen e forcave zjarrfikëse nga bashkitë fqinje.
Situata mbetet kritike, ndërsa forcat në terren vijojnë përpjekjet për të parandaluar përhapjen e flakëve drejt banesave dhe zonave të tjera të banuara.
