Vrasja e Viktor Bardhit, i njohur edhe me mbiemrin Marku, në Ndërfushas të Mirditës vijon të mbetet pa autorë të identifikuar, ndërsa grupi hetimor po punon për të rindërtuar lëvizjet e ekzekutorëve para dhe pas atentatit.
Një nga vështirësitë kryesore të hetimit lidhet me terrenin ku ndodhi krimi. Mësohet se në hyrje të fshatit Ndërfushas ka kamera sigurie, por nga këqyrja e pamjeve nuk është evidentuar lëvizja e ndonjë automjeti në intervalin kohor kur dyshohet se është kryer vrasja.
Për këtë arsye, hetuesit dyshojnë se autorët mund të kenë përdorur nënkalimin e Rrugës së Kombit për t'u larguar nga vendngjarja. Një tjetër skenar që po shqyrtohet është që ekzekutorët të kenë kaluar në këmbë përtej barrierave mbrojtëse të rrugës, të cilat ndodhen vetëm pak metra larg vendit ku dyshohet se ishte ngritur prita.
Deri më tani, as këqyrja e kamerave të sigurisë në pikat hyrëse dhe dalëse të Rrëshenit nuk ka dhënë gjurmë të automjetit që mund të jetë përdorur nga autorët.
Ndërkohë, pikëpyetje janë ngritur edhe rreth automjetit të gjetur të djegur në zonën e Munazit. Mjeti u zbulua rreth 20 minuta pasi familjarët e 65-vjeçarit njoftuan se e kishin gjetur atë të pajetë. Megjithatë, brenda automjetit nuk janë gjetur armë apo prova të tjera që, deri në këtë fazë, ta lidhin drejtpërdrejt me ekzekutimin.
Kjo ka bërë që hetuesit të mos përjashtojnë mundësinë që automjeti i djegur të mos jetë përdorur për kryerjen e atentatit, por të jetë lënë qëllimisht për të humbur gjurmët dhe për ta orientuar hetimin drejt një piste të gabuar.
Një tjetër pistë që po shqyrtohet është ajo e bashkëpunëtorëve. Dyshohet se ekzekutorët mund të jenë ndihmuar nga persona të tjerë, të cilët mund t'i kenë pritur me një automjet të dytë pas vrasjes dhe më pas t'i kenë larguar nga zona.
Hetimet vijojnë për identifikimin e autorëve, zbardhjen e plotë të mënyrës së organizimit të atentatit dhe përcaktimin e personave që mund të kenë ndihmuar ekzekutorët para ose pas krimit.
