Policia e Vlorës ka reaguar zyrtarisht për ngjarjen e rëndë të regjistruar në zonën e Radhimës, ku dyshohet se janë përfshirë në një konflikt të armatosur biznesmenët Vasil Bedini dhe Luan Muça. Megjithatë, në njoftimin paraprak të Policisë nuk bëhet publik emri i asnjë prej personave të përfshirë në ngjarje.
Njoftimi i Policisë:
Vlorë/Informacion paraprak
Rreth orës 11:30, pronari i një resorti në Vlorë ka njoftuar Policinë se persona të armatosur po konfliktoheshin me të.
Menjëherë pas njoftimit, shërbimet e Policisë kanë shkuar në drejtim të adresës së dhënë, si dhe kanë ngritur pika kontrolli.
Shërbimet e Policisë, në afërsi të Pusit të Mezinit, kanë konstatuar një automjet që lëvizte me shpejtësi dhe janë vënë në ndjekje të tij.
Drejtuesi i këtij automjeti ka humbur kontrollin dhe është aksidentuar. Në automjet janë konstatuar 3 shtetas, 2 prej të cilëve janë dëmtuar si pasojë e aksidentit, ndërsa tjetri nuk ka probleme shëndetësore.
Gjatë kontrollit në automjet, shërbimet e Policisë kanë gjetur 1 armë zjarri, pistoletë.
Është ngritur një grup i posaçëm hetimor, i cili, në drejtimin e Prokurorisë, po punon për zbardhjen e dinamikës së ngjarjes dhe identifikimin e të gjithë shtetasve të përfshirë.
Shërbimet e Policisë së DVP Vlorë, në bashkëpunim me shërbimet e disa DVP-ve të tjera, po kryejnë kontrolle dhe veprime të tjera, me qëllim identifikimin dhe kapjen e shtetasve të tjerë të përfshirë në këtë ngjarje.
Meqenëse veprimet janë dinamike, në përfundim të veprimeve të para hetimore do të ketë një njoftim të plotë për ngjarjen.
Ndërkohë, VNA raportoi më herët se konflikti dyshohet se ka ndodhur në një hotel në zonën e Radhimës dhe se pronari i tij, Vasil Bedini, është dhunuar dhe ka përfunduar në spital.
Sipas informacioneve paraprake të siguruara nga VNA, përplasja dyshohet se ka nisur për shkak të një shume parash, që mund të lidhet me një gjobë ose një borxh të papaguar. Gjatë konfliktit dyshohet se janë përdorur edhe armë, ndërsa i plagosur ka mbetur edhe Luan Muça, pronar i kompanisë “Delta”.
Personat që dyshohet se kanë sulmuar pronarin e hotelit janë larguar me automjet, por gjatë arratisjes makina është përmbysur në rrugë. VNA ka siguruar edhe pamjet e automjetit të përmbysur pas ngjarjes.
Vlen të theksohet se reagimi zyrtar i Policisë erdhi vetëm pasi VNA bëri publike ngjarjen dhe raportoi detajet e para mbi personat e përfshirë. Por edhe pas publikimit të rastit, Policia sërish nuk ka guxuar të bëjë të ditur qoftë edhe me iniciale identitetin e personave të përfshirë në këtë ngjarje të rëndë, duke u mjaftuar me një njoftim pa emra dhe pa sqaruar se cilët janë personat e shoqëruar, të dëmtuar apo të dyshuar për konfliktin.
