Në seancën e sotme plenare në Kuvend, interpelanca e thirrur nga deputetja demokrate Ina Zhupa me ministren e Arsimit, Ogerta Manastirliu, u shoqërua me debate të forta. Çështja e diskutimit ishte vrasja tragjike e 14-vjeçarit Martin Cani pranë shkollës “Fan Noli”.
Ministrja Manastirliu akuzoi deputeten Zhupa për mungesë ndjeshmërie dhe përdorimin e ngjarjes për përfitime politike. Ajo theksoi se reagimi i saj ndaj ngjarjes ka qenë i menjëhershëm dhe i qartë, duke shtuar se akuzat për heshtje janë të pavërteta.
“Je në hall për një karrige. Të shfrytëzosh dhimbjen e të tjerëve tregon mungesë ndjeshmërie,” tha Manastirliu.
Nga ana tjetër, deputetja Zhupa vendosi një pankartë me mbishkrimin “Ogerta jep dorëheqjen” në foltoren e Kuvendit, duke kërkuar largimin e ministres për shkak të përgjegjësive në këtë rast. Kjo lëvizje shkaktoi reagimin e kryeparlamentares Elisa Spiropali, e cila i bëri thirrje Zhupës të ulej në vend dhe urdhëroi Gardën e Republikës të hiqte pankartën.
“Zonja Zhupa, uluni në vend dhe mos e prekni foltoren e Kuvendit,” tha Spiropali.
Sipas Zhupës, Manastirliu nuk ka treguar ndonjëherë përkushtim ndaj problematikave të arsimit deri në momentin kur pozicioni i saj si ministre u vu në rrezik.
“Ogerta Manastirliu shpëtoi që ishte ministre arsimi. Deri në ato momente nuk e kishte kuptuar akoma që ishte ministre sepse nuk e kishim parë në asnjë shkollë, as të diskutonte ndonjë problematikë,” deklaroi Zhupa.
