Zgjedhjet brenda Partisë Demokratike mund të rikthejnë edhe njëherë përçarjen mes demokratëve, atyre që kanë mbështetur Sali Berishën dhe pjesës tjetër që i është bashkuar pak më vonë. Disa prej demokratëve në degën nr.2 të Partisë Demokratike në Tiranë i kanë quajtur të manipuluara zgjedhjet e së shtunës.
Lidhur me këto zgjedhje ka ardhur një tjetër reagim nga kandidatja për postin e kryetares në këtë degë.
Irma Marku, përmes një reagimi publik në llogarinë e saj në “Facebook”, i është drejtuar me një pyetje grupit të punës në zgjedhjet e 11 janarit.
Teksa ka publikuar me emër të gjithë anëtarët të cilët kanë marrë pjesë në votim, Marku pyet Mimoza Hajdarmatajn, Jorida Tabakun, Mirlinda Çollakun, Sokol Allarajn dhe Anisa Kadeshan se “kush i ka sjellë votuesit e degëve të tjera, edhe nga Kukësi, që të votonin në degën nr.2?”.
Lidhur me zgjedhjet e 11 janarit reagoi edhe ish-drejtor i Institutit të Studimeve të Krimeve të Komunizmit, Agron Tufa, i cili i kërkoi publikisht ish-kryeministrit Sali Berisha që t’i japë fund kësaj “sëmundje të hershme” pasi në të kundërt kjo ndërhyrje nga lart e Kryesisë Qendrore nëpër degët e PD-së, do e “shpartallojë” vullnetin e votuesve demokratë dhe askush nuk do t’i besojë më.
“Ajo që ka ngjarë dje me zgjedhjet në degën nr. 2 të PD-së në Tiranë me megamanipulimin e vullnetit të lirë të anëtarëve të kësaj dege, me truket, falsifikimet, për të nxjerrë me doemos një fitues sipas shijeve të diktuara nga Grupi i Punës, është një ogur kobzi për perspektivën e ardhshme të zgjedhjeve nëpër degët e tjera dhe minim i rrugës së popullit demokrat drejt 11 majit 2025”, shkruante Tufa ndër të tjera.
