Gjykata e Apelit të Posaçëm ka zbardhur arsyet mbi të cilat është bazuar vendimi për caktimin e masës së re të sigurisë ndaj ish-kryeministrit Sali Berisha. Më poshtë paraqiten argumentet kryesore të gjykatës:
- Kushtet për caktimin e masës së sigurimit personal
- Gjyqtari i hetimeve paraprake nuk ka paraqitur elementë të rinj që të vërtetojnë mungesën e kushteve specifike si rreziku i ikjes apo dëmtimi i provave.
- Vendimi i mëparshëm për masën “Detyrim për t’u paraqitur në policinë gjyqësore” është konfirmuar nga të gjitha shkallët e gjykimit, përfshirë edhe Gjykatën Kushtetuese.
- Masa “Arrest në shtëpi” u vendos për shkak të shkeljes së detyrimeve të masës së mëparshme, dhe jo për shtim të rreziqeve.
- Kërkesa e Sali Berishës për shfuqizimin e masës së sigurisë është rrëzuar më parë në të treja shkallët e gjykimit.
Gjykata vlerëson se nuk ka vend për shfuqizimin e masës së sigurisë personale. Rivlerësimi i kryer nga gjyqtari i seancës paraprake, pa shtuar elementë të rinj, bie ndesh me parimin e gjësë së gjykuar.
- Zëvendësimi i masës nga “Arrest në shtëpi” në “Detyrim për t’u paraqitur në policinë gjyqësore”
Gjykata shqyrtoi disa faktorë:
- Periudhën njëvjeçare që kërkuesi ka kaluar me masën “Arrest në shtëpi”.
- Alibitë e ngritura nga kërkuesi për antikushtetueshmërinë e masës së mëparshme janë rrëzuar nga Gjykata Kushtetuese.
- Mosha e kërkuesit dhe rrethana të tjera të konsideruara nga gjyqtari i hetimeve paraprake.
- Fakti që jemi në prag të fushatës zgjedhore dhe kërkuesi konsiderohet si lider i opozitës, sipas vendimit të Gjykatës Kushtetuese.
Gjykata vlerësoi se masa “Arrest në shtëpi” nuk ishte më e nevojshme, pasi kërkuesi ka shlyer pasojat e shkeljes së masës së mëparshme dhe vendosi t’i japë atij mundësinë të respektojë detyrimet e masës së re.
Në rast se Sali Berisha nuk përmbush detyrimet e masës “Detyrim për t’u paraqitur në policinë gjyqësore”, prokuroria do të ketë të drejtë të kërkojë sërish zëvendësimin me një masë më të rëndë sigurimi.
