Një aspekt i fushatës së kryetarëve të partive kryesore politike në vend, PD dhe PS, është edhe gara se kush do të fitojë “simpatinë” e administratës së re të presidentit të SHBA-së, Donald Trump.
Kryetari i Partisë Demokratike, Sali Berisha, gjatë fjalës së mbajtur në promovimin e librit të autorit Simon Mirakaj, ka përshëndetur sërish fitoren e presidentit Trump. Berisha e quajti të jashtëzakonshme fitoren e Presidentit Trump.
“Fitoren e Trump e kam quajtur më të jashtëzakonshmen, para së gjithash për shkak të censurës. Sot jemi në një diktaturë të re,” - theksoi Berisha në fjalën e tij.
Ndërkohë që Berisha i bën jehonë fitores së Trump në SHBA, me shpresën se kjo do të ndikojë në rrëzimin e Ramës në Shqipëri, ky i fundit sot ka shpallur dhëndrin e Trump si investitor strategjik.
Komiteti i Investimeve Strategjike, i drejtuar nga kryeministri Edi Rama, i dha statusin investitor strategjik kompanisë së lidhur me Jared Kushner për ndërtimin e një resorti turistik në ishullin e Sazanit, pak ditë përpara ngjitjes së presidentit Trump në Shtëpinë e Bardhë.
Tashmë mbetet për t’u parë se kë do të zgjedhë të shpëtojë presidenti i ri i SHBA-së: regjimin e Ramës apo “non gratën” e Berishës. Deklaratat triumfale të kreut të PD-së, apo investimet strategjike që ia dhuron Rama. Sepse me shqiptarët janë mësuar tashmë, prej 34 vitesh ia hedhin fajin njëri-tjetrit për mëkatet që kanë bërë me pushtetin që e mbajnë me radhë.
