Prokuroria Themelore e Ferizajt ka kërkuar masën e paraburgimit prej 30 ditësh për gjashtë të dyshuarit në lidhje me vrasjen e rreshterit të Policisë së Kosovës, Muhamed Lika. Të dyshuarit – Haki Bela, Rilind Murati, Vatan Çaka, Edmond Lika, Shkëlqim Kuka dhe Diamand Gashi – ngarkohen me veprën penale “Vrasje e rëndë”, sipas Kodit Penal të Republikës së Kosovës.
Ngjarja tronditëse ndodhi në rrugën “Idriz Seferi” në Kaçanik, teksa rreshteri Lika ishte duke u kthyer në banesën e tij pas përfundimit të orarit të punës. Sipas hetimeve të Prokurorisë, ai ishte ndjekur nga pas dhe, në momentin kur po ngjitej në shkallët e ndërtesës, është qëlluar me armë zjarri nga Rejhan Bela, i cili në momentin e ngjarjes ishte vetëm 17 vjeç. Në vendin e ngjarjes janë gjetur katër gëzhoja të kalibrit 9 mm, ndërsa Lika ka ndërruar jetë si pasojë e plagëve të marra.
Të pandehurit ndodhen në ndalim 48-orësh që prej 22 prillit 2025, pas një aksioni të Policisë së Shtetit të zhvilluar në orët e para të mëngjesit në Kaçanik. Arrestimi i tyre erdhi si rezultat i hetimeve intensive të nisura menjëherë pas krimit.
Tre nga të arrestuarit janë aktualisht në procedim penal edhe për djegien e objektit të Gjykatës së Kaçanikut dhe për shpërndarjen e pamfleteve me përmbajtje ekstremiste. Megjithatë, kryeprokurori Burim Cekrini ka sqaruar se nuk ka prova që këta individë të kenë lidhje me ndonjë organizatë terroriste si ISIS.
Pista kryesore e hetimeve mbështetet në dyshimin se vrasja e rreshterit Lika lidhet me detyrën e tij si oficer policie, pasi ai kishte qenë pjesë e operacioneve hetimore kundër një grupi kriminal aktiv në zonë.
Prokuroria pritet të vazhdojë hetimet për të zbardhur plotësisht motivet dhe rrethanat e kësaj vrasjeje, që ka tronditur opinionin publik dhe radhët e Policisë së Kosovës.
