Të gjitha provimet profesionale në Maqedoninë e Veriut do të jepen edhe në gjuhën shqipe, kështu ka deklaruar nëpërmjet një komunikate koalicioni VLEN.
Sipas tyre, procesi nis me provimin e jurisprudencës në shqip, ndërsa më pas kjo praktikë do të shtrihet në të gjitha provimet profesionale.
VLEN thotë se shqiptarët nuk kërkojnë më deklarata politike, por zgjidhje konkrete, duke shtuar se zgjidhja po vjen.
Ndërkohë, nga ky koalicion janë drejtuar kritika ndaj BDI, duke pretenduar se gjatë periudhës së saj në qeverisje nuk është bërë zgjidhja e kësaj çështjeje.
Reagimi i plotë
BDI-ja mendon se turpi mbulohet me zhurmë. Por provimi i jurisprudencës nuk zgjidhet me britma e me rrena. Zgjidhet me punë. E punën ata e kishin në dorë për vite me radhë, por nuk e bënë. Ministria e Drejtësisë kaloi prej një kuadri të BDI-së te tjetri. Pas Blerim Bexhetit, me mbi 1000 ditë ministër, erdhi Adnan Jashari. Mandat kishte, kompetenca kishte, vulë kishte. Vetëm vullnet për studentët shqiptarë nuk kishte. Ky ka qenë zanati i BDI-së. Shqiptarëve pritje, të vetëve përparësi. Për studentët “do ta shohim”, por kur ishte puna për rrethin e tyre, sistemi ndizte motorët menjëherë. Pikërisht në kohën e Adnan Jasharit, djali i Talat Xhaferit u pajis me provimin e jurisprudencës, edhe pse ishte ende i padiplomuar. Pra, për studentët shqiptarë nuk kishte zgjidhje në gjuhën shqipe, ndërsa për djalin e funksionarit të BDI-së sistemi funksiononte. Për të vetët e gjenin çaren, ndërsa hallin e shqiptarëve e linin zvarrë. Prandaj Adnan Jashari duhet të përgjigjet pse nuk e zgjidhi provimin e jurisprudencës në gjuhën shqipe kur ishte ministër i Drejtësisë.
