Kryeministri Edi Rama ishte sot për një vizitë zyrtare në Hungari ku u takua me homologun e tij, Viktor Orban. Krerët e shteteve firmosën dy marrëveshje në fushën e bujqësisë dhe administratën publike.
Në një konferencë të përbashkët, Rama tha se këto marrëveshje do të ndihmojnë Shqipërinë në procesin e integrimit. Ai gjithashtu deklaroi se folën edhe për investimet në vendin tonë.
“Dy marrëveshje në fushën e bujqësisë dhe administratës politike, e cila është shumë e rëndësishme për të gjitha ato vende që janë në procesin e anëtarësimit. Folëm edhe për investimet dhe i thashë Orban-it që ndihemi të inkurajuar që shoqëritë hungareze po investojnë, shifrat janë të pazakonta krahasuar me vende si Shqipëria në madhësi, 350 mln euro, shifër domethënëse për ekonominë tonë”, theksoi kryeministri.
