Ngjarja e rëndë e dhunës mes të miturave në Fier, e cila tronditi opinionin publik pas publikimit të një videoje në rrjetet sociale, rezulton se ishte denoncuar në polici disa javë përpara se pamjet të bëheshin publike.
Sipas të dhënave, më 8 qershor 2026, një 17-vjeçare, e shoqëruar nga nëna e saj, kallëzoi në Policinë e Fierit se ishte dhunuar dhe filmuar në banesën e një 19-vjeçareje. Në dëshminë e saj ajo identifikoi si autore 19-vjeçaren dhe dy vajza 15-vjeçare. Këto të fundit pranuan se e kishin goditur për motive të dobëta, ndërsa policia regjistroi procedim penal për veprën “Dëmtime të tjera me dashje”.
Pavarësisht këtij denoncimi, çështja mbeti jashtë vëmendjes publike deri në publikimin e videos, e cila tregoi me detaje momentet e dhunës. Pamjet zbuluan se nuk bëhej fjalë për një konflikt spontan mes dy adoleshentesh. Në video shihen dy vajza që ushtrojnë dhunë ndaj 17-vjeçares, ndërsa një e tretë filmon dhe, sipas pamjeve, i nxit ato të vazhdojnë.
Ndërkohë, më 28 qershor, një zhvillim tjetër lidhi sërish emrin e njërës prej të miturave me policinë. Njëra nga dy 15-vjeçaret u arrestua pas kallëzimit të bërë nga vetë nëna e saj, e cila deklaroi se ishte dhunuar fizikisht nga e bija. Pas vlerësimit të gjendjes së saj nga autoritetet dhe prokuroria, e mitura u dërgua për trajtim në një institucion të shëndetit mendor në Tiranë.
Vetëm pas publikimit të videos, ngjarja mori përmasa kombëtare dhe shkaktoi reagime të forta në opinionin publik. Familjarët e 17-vjeçares kanë deklaruar se ajo po kalon një gjendje të rënduar psikologjike si pasojë e dhunës dhe e publikimit të pamjeve.
Policia e Shtetit ka bërë të ditur se ka kryer të gjitha veprimet procedurale që në momentin e parë të kallëzimit. Megjithatë, kronologjia e ngjarjes ka ngritur pikëpyetje mbi mënyrën se si funksionuan mekanizmat e mbrojtjes së të miturve. A mjaftonte regjistrimi i një procedimi penal në një rast ku ishin të përfshirë disa të mitur, dhuna ishte filmuar dhe viktima kishte nevojë për mbështetje të menjëhershme psikologjike dhe sociale?
Po aq e rëndësishme mbetet edhe pyetja nëse, pas denoncimit të 8 qershorit, u aktivizuan të gjitha institucionet përgjegjëse – shërbimet sociale, psikologët, strukturat e mbrojtjes së fëmijëve dhe prokuroria – për të mbrojtur viktimën dhe për të parandaluar pasoja të mëtejshme.
Ngjarja e Fierit ka tronditur opinionin publik jo vetëm për brutalitetin e dhunës, por edhe sepse ka krijuar perceptimin se rasti mori vëmendjen që meritonte vetëm pasi videoja u bë virale. Dhe kjo është pyetja që vazhdon të kërkojë përgjigje: a do të kishte qenë i njëjtë reagimi institucional nëse pamjet nuk do të ishin bërë publike?
