GJKKO rrëzon kërkesën e Ajola Xoxës për pezullimin e gjykimit me 63 ditë, por shtyn seancën dhe pezullon sërish afatet e paraburgimit për Veliajn
TIRANË – Gjykata e Posaçme zhvilloi këtë të hënë seancën e radhës të gjykimit në themel ndaj kryebashkiakut të Tiranës, Erion Veliaj, dhe të pandehurve të tjerë. Veliaj nuk ishte i pranishëm në sallë, duke vijuar qëndrimin e tij për të mos marrë pjesë në seancat që zhvillohen me të në kafazin e qelqtë.
Në seancë, përmes avokatëve të saj, Ajola Xoxa kërkoi që procesi gjyqësor të pezullohej për 63 ditë, duke argumentuar se më 29 qershor ka sjellë në jetë një fëmijë me lindje cezariane dhe, për shkak të gjendjes shëndetësore, nuk mund të marrë pjesë në proces dhe as të komunikojë në mënyrë efektive me mbrojtësit e saj.
Xoxa deklaroi gjithashtu se dëshiron të jetë personalisht e pranishme në gjykim dhe nuk autorizon avokatët ta përfaqësojnë në mungesë.
SPAK e kundërshtoi kërkesën, duke argumentuar se ligji nuk parashikon pezullimin e gjykimit për shkak të lejes së lindjes. Sipas prokurorisë, nëse gjykata e konsideronte të domosdoshme praninë e Xoxës, zgjidhja ligjore do të ishte ndarja e çështjes së saj nga ajo e të pandehurve të tjerë.
Pas shqyrtimit të kërkesës, GJKKO vendosi të mos pezullojë gjykimin për 63 ditë, siç kërkoi mbrojtja.
Në arsyetimin e saj, gjykata vëren se Ajola Xoxa nuk ka qenë e pranishme në asnjë seancë që prej fillimit të gjykimit dhe deri më sot, duke u përfaqësuar vazhdimisht nga avokatët. Nga ana tjetër, gjykata pranoi se provohet që ajo ka sjellë në jetë një fëmijë me lindje me operacion dhe, për këtë arsye, vendosi t’i japë mundësinë reale të marrë pjesë në proces.
Pikërisht për këtë arsye, gjykata shtyu seancën, por jo për 63 ditë. Seanca e radhës u caktua më 21 korrik, në orën 10:00.
Gjykata arsyetoi se dokumenti i paraqitur nga mbrojtja ishte raport barrëlindjeje dhe jo raport paaftësie për punë, ndaj nuk ekzistonin kushtet ligjore për pezullimin e shqyrtimit gjyqësor për dy muaj.
Për shkak se procesi nuk u zhvillua në themel dhe u shty për një datë tjetër, GJKKO vendosi edhe pezullimin e afateve të paraburgimit për të pandehurit që ndodhen në masën “arrest në burg”, përfshirë Erion Veliajn, deri në seancën e 21 korrikut.
Pra, gjykata mori dy vendime të ndryshme: rrëzoi kërkesën për pezullimin e gjykimit për 63 ditë, por pranoi shtyrjen e seancës deri më 21 korrik, duke pezulluar ndërkohë edhe afatet e paraburgimit për Veliajn. Kjo do të thotë se gjykimi nuk ndalet për dy muaj, por thjesht shtyhet për rreth dy javë.
