Protesta qytetare ka hyrë në ditën e saj të 36-të dhe po zhvillohet sërish sot me të njëjtin itinerar, një ditë pas tensioneve të regjistruara pranë Komisariatit nr. 3 në Tiranë, ku një grup personash të maskuar thyen xhamat e godinës dhe u përplasën me policinë.
Organizatorët janë distancuar publikisht nga aktet e dhunës. Aktivisti Arben Kola deklaroi se personat që sulmuan komisariatin nuk janë pjesë e grupit nismëtar të protestës, por, sipas tij, bëhet fjalë për elementë të sponsorizuar nga qeveria me qëllim diskreditimin e lëvizjes qytetare.
“E deklarojmë se protesta deri në fund do të jetë paqësore, pavarësisht investimit të qeverisë apo segmenteve pranë saj që nxisin dhunën. Mbrëmë e thamë qartë se protesta kishte përfunduar dhe kush qëndroi më pas nuk ishte pjesë e organizimit tonë. Ata që ushtruan dhunë janë elementë të sponsorizuar nga qeveria. Sado të përpiqet kjo qeveri ta njollosë protestën, nuk do t’ia dalë. Asnjë prej personave që ushtroi dhunë nuk është pjesë e grupit nismëtar të protestës”, u shpreh Kola.
Pas grumbullimit në sheshin “Skënderbej”, protestuesit marshuan drejt Kryeministrisë, ku u hodhën thirrje kundër kryeministrit Edi Rama dhe kreut të Partisë Demokratike, Sali Berisha.
Protesta nisi 36 ditë më parë si një reagim qytetar kundër ndërtimit të një resorti luksoz në zonën e mbrojtur të Zvërnecit, por gjatë javëve të fundit është shoqëruar me incidente dhe përplasje me Policinë e Shtetit, deputetë të Kuvendit dhe institucione të tjera.
