Ligji “Antimafia” i cili synon të eleminojë pasuritë e vëna në rrugë kriminale, i është nënshtruar për herë të parë një kontrolli nga Kuvendi, se si po zbatohet ai.
Gjatë mbledhjes së Komisionit për Çështjet Ligjore, Ulsi Manja renditi të dhënat e përdorimit të këtij instrumenti kyç 15-vjeçar në luftën kundër krimit dhe korrupsionit.
“Rezulton se ligji ka prodhuar rezultate, por kryesisht në fushën e narkotikëve dhe krimit të organizuar, ndërsa potenciali në luftën kundër korrupsionit mbetet i pashfrytëzuar. Policia e Shtetit ka rritur referimet pasurore nga 133 (në vitin 2020) në 317 (në vitin 2025). Vlera e pasurive të sekuestruara dhe konfiskuara u rrit nga 5 milionë euro (në 2020) në mbi 178 milionë euro (në 2024). Sekuestrimi përdoret shpesh, por konfiskimi mbetet i kufizuar dhe i varur nga ecuria gjyqësore. Zbatimi i ligjit është përqendruar pothuajse ekskluzivisht pranë Gjykatës së Posaçme (GJKKO), ndërsa gjykatat e rretheve e përdorin shumë pak”,-tha Manja.
Studimi i cili mban autorësinë e një grupi ekspertësh të pavarur të mbështetur nga ambasada britanike, tregon se sfidat dhe pengesat që institucionet raportuan si vështirësi informalitetin ekonomik, mungesën e aksesit të shpejtë në të dhënat kadastrale dhe bankare, si dhe nevojës për sisteme të integruara të dhënash.
Gjithashtu u theksua rreziku që pasuritë e konfiskuara të rikthehen në mënyrë të tërthortë te personat e goditur, gjë që kërkon forcimin e Agjencisë së Administrimit të Aseteve të Sekuestruara.
“Raporti evidenton nevojën për forcimin e mekanizmave të administrimit dhe ripërdorimit të pasurive të konfiskuara, përfshirë vendosjen e kontrollit paraprak në procesin e shitjes, në mënyrë që të shmanget rreziku, që pasuritë të rikthehen në mënyrë të tërthortë tek personat ndaj të cilëve janë zbatuar masat", -lexoi Manja.
Më tej, ai shton se kjo kërkon që "agjencia e sekuestrimit të aseteve... do duhet të forcojë kapacitetet e saja jo vetëm për të standartizuar procedurat e trajtimit të pronave të sekuestruara dhe të konfiskuara por duhet t'i vërë në përdorim" .
Kjo çështje cilësohet si një nga problematikat kryesore që nga hyrja në fuqi e ligjit, duke theksuar se suksesi i konfiskimit varet edhe nga mënyra se si pasuria përdoret më pas në interes të shoqërisë.
