Mateo Likaj, 17 vjeç, i cili u plagos nga shoku i tij teksa festonin në një banesë në zonën e ish-doganës, ndërroi jetë mbrëmjen e djeshme në spitalin e Traumës.
I mituri, nuk mundi të mbijetonte, pasi plumbi e kishte prekur në kokë dhe gjendja e tij u përkeqësua ndjeshëm, pavarësisht përpjekjeve të mjekëve për ta mbajtur në jetë.
Ngjarja tragjike ndodhi më 23 maj 2026, ku në rrugën “Berit Beker”, pranë Ish-Doganës, u gjet i shtrirë në tokë shtetasi Mateo Likaj, 17 vjeç, i plagosur me armë zjarri në pjesën e ballit.
Fillimisht u mendua se i mituri ishte qëlluar në rrugë, por nga veprimet e mëtejshme rezultoi se Rigers Sylaj, 19 vjeç, kishte ftuar shokët e tij, Adri Veshti, Serxho Koci, Kristel Koci, Erjon Halilaj dhe Mateo Likaj, të qëndronin në shtëpinë e tij, pasi prindërit i kishte jashtë vendit.
Ata kanë blerë dy shishe pije alkoolike “Gin Gordons” dhe janë ulur në oborrin e banesës duke konsumuar alkool. Rigers Sylaj ka marrë armën pistoletë dhe nga hetimet e fundit ka rezultuar se ka qëlluar dy herë, jo vetëm njëherë siç edhe u tha në momentet e para. I mituri Likaj është plagosur prej tij me plumb në kokë dhe me qëllim për ta fshehur ngjarjen, ata e kanë nxjerrë në rrugë dhe kanë lajmëruar policinë. Nisur nga të dhënat e reja të zbuluara nga hetimet ndaj Sulajt është ngritur akuza e re e vrasjes për shkak të cilësive të veçanta të viktimës.
