Një incident i rëndë ka ndodhur sot në mesditë në plazhin e Gjipesë, ku një turist gjerman është dëmtuar nga helikat e një mjeti lundrues ndërsa po notonte në det.
Sipas informacioneve paraprake, rreth orës 13:40, shtetasi gjerman D. S., 46 vjeç, ka pësuar lëndime gjatë një zhytjeje në afërsi të një gomoneje, e cila drejtohej nga shtetasi shqiptar K. V., 27 vjeç, banues në Orikum. Mjeti lundrues ishte me dokumentacion të rregullt dhe ndodhej jashtë zonës së sigurisë së notimit, në një distancë të konsiderueshme nga tapat ndarëse.
Pas incidentit, shërbimet e Policisë Kufitare të SPK Dhërmi ndërhynë menjëherë, duke i dhënë ndihmën e parë të dëmtuarit dhe duke organizuar transportimin e tij të menjëhershëm drejt spitalit për trajtim mjekësor.
Ndërkohë, drejtuesi i gomones është shoqëruar në Stacionin e Policisë Dhërmi, bashkë me disa dëshmitarë të pranishëm në momentin e ngjarjes. Grupi hetimor, nën drejtimin e Prokurorisë, ka nisur punën për zbardhjen dhe dokumentimin e plotë të rrethanave të këtij incidenti.
Gjendja shëndetësore e turistit mbetet ende e paqartë. Autoritetet bëjnë thirrje për respektimin e zonave të notimit dhe rregullave të lundrimit, për të garantuar sigurinë e pushuesve dhe vizitorëve në vijën bregdetare shqiptare.
