Sali Berisha, 79 vjeç, u përjashtua nga Britania nga Priti Patel për shkak se kishte "lidhje të qarta me grupe të krimit të organizuar". Ish-kryeministri i akuzuar për korrupsion në Shqipëri ka shpenzuar mbi 400,000 £ për të luftuar ndalimin e tij nga hyrja në Britani. Sipas Priti Patel, ai kishte "lidhje të qarta me grupe të krimit të organizuar dhe kriminelë" që përbënin kërcënim për sigurinë publike në Mbretërinë e Bashkuar dhe në Shqipëri.
Berisha ka qenë president i Shqipërisë nga viti 1992 deri në 1997 dhe kryeministër nga 2005 deri në 2013. Aktualisht është udhëheqës i Partisë Demokratike të opozitës. Në dhjetor të vitit të kaluar, një gjykatë shqiptare vendosi që Berisha të vendoset në arrest shtëpiak, pasi po hetohej për abuzim me detyrën për të përfituar dhëndri i tij.
Berisha i ka mohuar akuzat dhe ka thënë se ato janë orkestruar nga kryeministri aktual, Edi Rama. Ai apeloi kundër urdhrit të përjashtimit në një tribunal të veçantë të imigracionit, por ai u hodh poshtë me arsyetimin se ishte e drejta sovrane e Mbretërisë së Bashkuar të kontrollojë hyrjen përmes kufijve të saj.
### Akuzë për ‘korrupsion pasiv’
Nga dokumentet në Shqipëri është zbuluar se Berisha ka shpenzuar mbi 500,000 € për të punësuar avokatë në Mbretërinë e Bashkuar për të luftuar çështjen e tij. Një burim në Shqipëri, që ka parë dosjen, tha: "Për qëllimin e kësaj apeli në SIAC (Komisioni i Veçantë i Apelimeve për Imigracion), vajza e tij nga llogaria e saj bankare në vitin 2022 ka bërë një pagesë prej 72,000 €. Më pas, në vitin 2023, një pagesë prej 250,000 € dhe pagesa e fundit prej 200,000 €."
Nuk ka sugjerime se vajza e tij është përfshirë në ndonjë nga akuzat për korrupsion. Këto dokumente kanë dalë në një dosje prej rreth 500 faqesh si pjesë e çështjes që po hetohet nga Gjykata e Posaçme për korrupsion dhe krim të organizuar (SPAK).
### Kërcënim akut për Britaninë
Çështja e Berishës çoi në zbulime se Zyra e Jashtme dhe Ministria e Brendshme e Mbretërisë së Bashkuar kanë nisur një projekt sekret për të ndaluar bosët e krimit shqiptar të operojnë në Britani. Qëllimi është të dobësohet kërcënimi që paraqesin grupet e krimit të organizuar dhe të mbrohen interesat e Britanisë në rajon.
Një dokument ligjor i Ministrisë së Brendshme nuk e përmend Berishën, por përshkruan bandat shqiptare si një "kërcënim akut" për Britaninë, duke theksuar se ata janë lojtarë të rëndësishëm në tregun e kokainës dhe të përfshirë në krime të rënda si trafikimi i qenieve njerëzore dhe i drogës. Bandat shqiptare po ashtu ndihmojnë politikanët në fushata zgjedhore duke blerë vota dhe duke kërcënuar votuesit.
Ky projekt synon të prishë lidhjet midis politikës dhe krimit duke koordinuar veprime kundër personave të ekspozuar politikisht nga të gjitha palët e politikës shqiptare.
