Kryeministri Edi Rama ka zhvilluar një takim me anëtarë të shoqatave shqiptare në New York, ku foli sërish për projektin e shtetit Sovran të Bektashinjve. Rama tha se projekti në fjalë do të kalojë në një sërë procesesh, të cilat duhet të jenë konform Kushtetutës së vendit.
Ai gjithashtu tha se kjo nismë do të diskutohet dhe do të shikohen të gjitha aspektet legjislative dhe se pohoi që nuk do të ketë referendum për ketë çështje, por nuk përjashtoi konsultimet dhe diskutimet.
“Shqipëria ka një Kushtetutë dhe ti e di shumë mirë dhe në bazë të Kushtetutës dhe mbi bazën e ligjeve ndërkombëtare ne do të votojmë një proces që do të jetë konform Kushtetutës dhe konform ligjeve ndërkombëtare, pa asnjë diskutim, sepse kjo nuk është një gjë që e thashë unë dhe u bë. Kjo ka një proces, do të diskutohen gjërat, do të shihen të gjitha aspektet legjislative dhe pastaj në fund, unë besoj që do të triumfojë arsyeja. Në këtë gjë po ju them ka vetëm të mira, çdo gjë mund të ketë ato të vetat, por në këtë gjë unë nuk shoh asnjë gjë që mund të thuash “jo po se kjo”. Asnjë, zero, që të mos flas për të mirat e tjera që sjell për Shqipërinë e për shumë e shumë gjëra nga pikëpamja e vizibilitetit, nga pikëpamja e interesit, atraksionit etj. Le të mos flasim për këto. Po flas vetëm për interesin tonë kombëtar dhe për trashëgiminë tonë historike, kulturore kombëtare. Kështu e shoh unë”, u shpreh Rama.
