Deputeti Enkelejd Alibeaj, ka reaguar në lidhje me skandalin e mbetjeve toksike. Në një postim në facebook, Alibeaj shkruan se Kurumi është gjeneruesi i sasive masive të helmeve të rrezikshme, që duke kompromentuar autoritetet shtetërore shqiptare ka arritur të kalojë në hanin pa porta të Portit te Durrësit.
Ai më tej shprehet se skandali meriton hetimin penal me skrupoloz dhe të shpejtë nga drejtësia shqiptare. Sipas tij, shumë palë politike duket se janë përzier në këtë mesele e për sajojnë sherrnaja të kota për të tërhequr vemendjen diku tjetër. Alibeaj më tej falënderon edhe VNA për denoncimin e skandalit.
Më poshtë reagimi i plotë i Enkelejd Alibeajt:
Tymi mediatik mbi mbetjet e rrezikshme te Kurumit të nisura nga Durrësi me destinacion Tajlandën mesa duket po davaritet. Mediat e pakapura dhe profesioniste e kanë bërë të qartë skandalin e shtetit shqiptar. Kurumi është gjeneruesi i sasive masive të helmeve të rrezikshme, që duke kompromentuar autoritetet shtetërore shqiptare (gjysmën e ministrive, autoritetin portual dhe një seri agjencish të tjera) ka arritur të kalojë në hanin pa porta të Portit te Durrësit, helmet që kanë alarmuar botën tej e mbanë. Ky skandal meriton hetimin penal me skrupoloz dhe të shpejtë nga drejtësia shqiptare. Kjo edhe për faktin, se duket sikur është harruar dicka: 2 anijet me kontenieret me helmin brenda, sipas rregullave duhet të kthehen në destinacion, pra në Durrës e dikush duhet t’iu dalë për zot. Anijet ende nuk kanë mbërritur, e madje pak info ka se ku ndodhen (nëse nuk kanë fikur radarët!) Ndaj drejtësia duhet të veprojë shpejt. Sentences “ndiq paranë” i duhet shtuar në këtë rast edhe “ndiq helmin”, …edhe pse në këtë rast ai po vjen vetë në port. Anijet, herët a vonë në Durrës duhet të ankorohen. Shumë palë politike duken të jenë të përzier në këtë mesele. Shqetësimi ndjehet në ajër. Ndaj, nuk i duhet lënë kohë e hapësirë politikës, që kur është e përzier në punëra të pista, sajojnë sherrnaja të kota për të tërhequr vemendjen diku tjetër. Vëmendja duhet mbajtur nga porti.
Deri më tani është vendi për një falëndërim, për mediat vna.al. dhe kapitali.al që me profesionalizëm të pastër davaritën të parat tymin e helmit politik. Gjithsesi asgjë nuk ka mbaruar. Kjo nuk duhet të jetë nga ato historitë që harrohen në 3 ditë. Ndaj sytë nga porti…dhe shpresat tek drejtësia!
