Një shpërthim me lëndë plasëse është regjistruar gjatë orëve të para të mëngjesit të kësaj të mërkure në Kamëz, duke shkaktuar dëme materiale në dy automjete të parkuara në oborrin e një banese.
Ngjarja ka ndodhur rreth orës 01:15, në rrugën “Lidhja e Prizrenit”, në oborrin e banesës së 56-vjeçarit Sokol Ndreu, ku dyshohet se është vendosur dhe ka shpërthyer një sasi lënde plasëse.
Sipas informacioneve paraprake të Policisë, nga shpërthimi janë dëmtuar dy automjete që ndodheshin të parkuara në oborrin e banesës.
Deri në këtë fazë nuk janë bërë të ditura rrethanat e plota të ngjarjes, ndërsa mbeten të paqarta motivet dhe personat që mund të jenë përfshirë në vendosjen e lëndës plasëse.
Autoritetet pritet të sqarojnë rrethanat e shpërthimit dhe të identifikojnë personat përgjegjës.
