RENEA dhe Policia e Tiranës po ushtrojnë kontrolle në zonën e Krujës, ku dyshon se fshihet 39-vjeçari Sadik Llani, autori i dyshuar i vrasjes së 27-vjeçarit Ardian Baloshi ditën e djeshme në rrugën Dervish Luzha.
Policia thotë se ai është person shumë i rrezikshëm dhe ka bërë thirrje qytetarëve që të kenë kujdes, pasi është dhe i armatosur, ndërsa ka vënë në dispozicion 10 mijë euro shpërblim për çdo qytetar që jep informacion për vendndodhjen.
Gjatë aksioneve që ka nisur në orët e para të mëngjesit të sotëm, policia ka ushtruar kontroll në 15 baza, ku mendohej se mund të fshihej Llani, por deri më tani nuk është rënë në gjurmët e tij. Drejt zonës së Krujës, policia është orientuar përmes kamerave të sigurisë, të cilat kanë fokusuar autorin e dyshuar të largohet drejt asaj zone pas vrasjes.
Llani ekzekutoi Baloshin ditën e djeshme, për motive që mbeten ende të paqarta. Ai më herët ka qenë i skeduar për çështje droge dhe rrezikshmëria që paraqet është e lartë.
