Një konflikt mes disa personave është regjistruar mesditën e kësaj të hëne në Velipojë. Sipas burimeve nga vendngjarja, përplasja ka degraduar në dhunë fizike, ndërsa njëri prej të përfshirëve dyshohet se ka qëlluar me armë zjarri në ajër.
Si pasojë e incidentit, një person i dëmtuar është transportuar në Spitalin Rajonal të Shkodrës, ku po merr ndihmën e nevojshme mjekësore. Burime spitalore bëjnë me dije se ai ndodhet jashtë rrezikut për jetën.
Policia ka arritur të identifikojë personat e përfshirë në konflikt dhe po vijon punën për lokalizimin dhe kapjen e tyre, si edhe të autorit të dyshuar që ka përdorur armën e zjarrit.
Ndërkohë, grupi hetimor po kryen veprimet procedurale për zbardhjen e plotë të rrethanave të ngjarjes, ndërsa motivet që çuan në konflikt mbeten ende të paqarta.
