Kryeministri i Shqipërisë, Edi Rama, ka folur në një intervistë për televizionin publik gjerman “ZDF” lidhur me projektin e planifikuar në zonën e Zvërnecit, protestat qytetare dhe zhvillimet politike në vend.
Sipas Ramës, projekti në Zvërnec përfaqëson një investim privat në vlerën rreth katër miliardë euro, të cilin Shqipëria “nuk mund t’i thotë jo”. Ai theksoi se aktualisht nuk ka një plan përfundimtar, pasi procesi ndodhet ende në fazën e shqyrtimit institucional dhe se autoritetet shtetërore po veprojnë me kujdes për të garantuar respektimin e rregullave dhe standardeve.
Duke iu përgjigjur pyetjeve mbi rolin e shtetit, Rama deklaroi se bëhet fjalë për pronë private dhe se zhvillimi i saj realizohet përmes marrëveshjeve mes pronarëve dhe investitorëve. Ai mohoi që të jenë bërë ndryshime ligjore për të lejuar ndërtimin në zona të mbrojtura, duke theksuar se këto zona kanë status të veçantë dhe mbrohen sipas kategorive dhe praktikave të Bashkimit Evropian.
Në lidhje me protestat kundër projektit, të cilat janë shoqëruar edhe me akuza për mungesë transparence dhe korrupsion, Rama u shpreh se qytetarët kanë të drejtë të protestojnë dhe të shprehin mendimin e tyre. Ai shtoi se protestat përbëhen nga dy grupe: qytetarë të zakonshëm me shqetësime reale dhe organizatorë që, sipas tij, i drejtojnë këto lëvizje.
Sa i përket vazhdimësisë së projektit, kryeministri deklaroi se Shqipëria nuk mund të refuzojë një investim të kësaj përmasë, por theksoi se nëse rezultati final nuk do të jetë i kënaqshëm, projekti nuk do të vijojë.
Rama gjithashtu komentoi edhe protestat e përditshme kundër projektit, të cilat janë quajtur “Revolucioni i Flamingove”, duke u shprehur se çështja e Zvërnecit nuk është më në qendër të debatit publik dhe se protestat kanë motive të ndryshme.
