Në vitin e 13-të të qeverisjes së tij, Edi Rama duket se ka bërë një zbulim të vonuar: Kadastra paska qenë një makth. Lajmi i mirë, sipas tij, është se tani ky makth do të marrë fund.
Gjatë aktivitetit të Javës së Administratës Publike, kryeministri premtoi se shërbimet do të përmirësohen falë sistemit dhe digjitalizimit, duke theksuar se “mund të ndërrosh sa kryeministra të duash, por përmirësimet vijnë nga sistemi”. Një deklaratë që ngre një pyetje të thjeshtë: nëse problemi ishte sistemi, kush e ndërtoi dhe e drejtoi atë gjatë këtyre 13 viteve?
Kadastra ka qenë prej vitesh një nga institucionet më të kritikuara nga qytetarët, me ankesa për vonesa, mbivendosje pronash, burokraci dhe korrupsion. Megjithatë, vetëm tani, në mandatin e katërt, qeveria pranon publikisht se situata është ende larg normales.
Ironia është se çdo reformë është prezantuar si zgjidhja përfundimtare. ALUIZNI u shkri, hipotekat u bashkuan, u krijua Agjencia Shtetërore e Kadastrës, u premtua revolucioni digjital dhe u investuan miliona euro. Sot, pas gjithë këtyre reformave, qytetarëve u thuhet se duhet të kenë edhe pak durim, sepse këtë herë sistemi do të funksionojë.
Nëse pas katër mandateve premtimi mbetet se “Kadastra nuk do të jetë më makth”, atëherë pyetja nuk është çfarë do të ndodhë nesër. Pyetja është se çfarë ka ndodhur gjatë këtyre 13 viteve, kur i gjithë sistemi ka qenë në duart e së njëjtës qeveri.
