Deputetja e Partisë Socialiste, Sara Mila, deklaroi se përfaqësuesit fillestarë të protestës qytetare për Zvërnecin do të dalin shumë shpejt publikisht së bashku me kryeministrin Edi Rama dhe institucionet përgjegjëse për të sqaruar, sipas saj, situatën rreth investimit në zonë.
E ftuar në emisionin “Off the Record” në A2 CNN, Mila tha se faza e parë e protestës u shoqërua me “tymnajë” dhe dezinformim, por shtoi se tashmë palët po shkojnë drejt dialogut.
“Edhe vetë përfaqësues të protestës, ata fillestarët, të vërtetët, jo këta që fshihen pas atij që vrau njerëzit në bulevard, do të dalin me zë e figurë, së bashku me kryeministrin dhe organet kompetente, dhe do të sqarohet e gjithë Shqipëria, sepse jemi drejt dialogut”, u shpreh deputetja socialiste.
Mila shtoi se qeveria ka marrë një mandat të fortë nga qytetarët për të çuar përpara integrimin europian të vendit dhe vuri në pikëpyetje përfaqësimin lokal të protestës, duke deklaruar: “Po më gjeni 10 vlonjatë që protestojnë? Kur nuk protestojnë vlonjatët.”
