Kryeministri Edi Rama ka reaguar pas protestës së zhvilluar një ditë më parë në Bulevardin “Dëshmorët e Kombit”, duke deklaruar se tubimi “ka humbur çdo arsye reale të nisjes”.
Përmes një postimi në rrjetet sociale, Rama e cilësoi reagimin e publikuar si një “video-kartolinë të pazakontë nga Shqipëria e shqiptarëve”, ndërsa theksoi se qeveria do të vijojë përpara me projektet dhe objektivat e saj.
“Shqipëria do bëhet sipas kontratës që kemi lidhur për herën e katërt në majin e shkuar me 83 vota”, shkruan Rama, duke iu referuar mbështetjes që mazhoranca gëzon në Kuvend.
Rama shprehet se protestës i kanë mbetur vetëm “arsyet e të huajve që nuk e duan Shqipërinë në Ligën e Kampionëve të Turizmit”, duke shtuar se sipas tij rrjetet sociale po “pompohen me ajrin toksik të luftës hibride”.
"Ju uroj një ditë të mbarë me një përqafim të veçantë për ata të mitë që kanë mbetur akoma peng i një proteste të cilës i ka humbur çdo arsye reale e nisjes, e ku të vetmet arsye të mbetura janë ato të të huajve që nuk e duan Shqipërinë në Ligën e Kampionëve të Turizmit dhe pompojnë rrjetet me ajrin toksik të luftës hibride, falë edhe naivitetit të tyre fatkeqësisht" shkruan Rama
