Ndërsa kundërshtarët e projektit turistik në Zvërnec kanë paralajmëruar një tjetër protestë gjatë ditës së sotme, kryeministri Edi Rama ka zgjedhur t’u përgjigjet kritikave përmes një postimi të gjatë në Facebook, ku sjell si shembull resortin luksoz Costa Navarino në Greqi.
Në mesazhin e publikuar mëngjesin e së martës, Rama e cilëson Costa Navarinon si një histori që dëshmon se projektet e mëdha zhvillimore shpesh përballen me kundërshtime, protesta dhe parashikime katastrofike përpara se të realizohen. Sipas tij, i njëjti debat është zhvilluar edhe në Greqi, ku kundërshtarët e resortit paralajmëronin shkatërrim të natyrës, zhdukje të biodiversitetit dhe betonizim të një prej peizazheve më të bukura të Mesdheut.
“Peticione. Protesta. Kundërshti. Debate. Parashikime apokaliptike”, shkruan Rama, duke shtuar se në fund projekti u ndërtua dhe sot konsiderohet një nga destinacionet turistike më prestigjioze të Europës, me mijëra vende pune dhe miliarda euro të gjeneruara për ekonominë lokale.
Kryeministri rendit gjithashtu një sërë treguesish mjedisorë të resortit grek, duke përmendur uljen e emetimeve të karbonit, përdorimin e energjisë së rinovueshme dhe riciklimin e ujit.
Edhe pse pa e përmendur drejtpërdrejt protestën e fundit në Tiranë, Rama e lidh qartë mesazhin me debatin për Zvërnecin. “Po Shqipëria s’mund ta ketë Costa Navarinon e saj? Patjetër që po, madje ende më rrezatuese botërisht mu aty, në Zvërnec”, shkruan ai.
Reagimi vjen vetëm një ditë pasi protestuesit kundër projektit u mblodhën para Kryeministrisë dhe paralajmëruan vijimin e aksioneve kundërshtuese, ndërsa një tjetër protestë është njoftuar për sot.
