Kryeministri Edi Rama deklaroi se deri në vitin 2028 Forcat e Armatosura shqiptare do të kenë të gjitha kapacitetet e nevojshme ushtarake, duke theksuar se ushtrisë nuk do t’i mungojë asnjë mjet, nga automjetet e lehta deri te armatimet më të sofistikuara.
Gjatë ceremonisë së dorëzimit të 40 mjeteve të para taktike të prodhuara në Shqipëri sipas standardeve të NATO-s nga kompania “Timak Defence”, Rama tha se po mbyllet një epokë kur ushtria përballej me mungesa të vazhdueshme në logjistikë.
“Plani ynë është që brenda vitit 2028 ushtria shqiptare të ketë të gjitha mjetet, që nga makina më e lehtë deri te armët më të sofistikuara. Nuk do të ketë asnjë mjet që do t’i mungojë Forcave të Armatosura. Do të kemi një flotë të madhe mjetesh sipas standardeve të NATO-s”, u shpreh kryeministri.
Ai shtoi se Forcat e Armatosura do të pajisen edhe me sisteme të tjera që kanë nisur të projektohen dhe prodhohen në vend, duke e cilësuar këtë si një hap të rëndësishëm për zhvillimin e industrisë shqiptare të mbrojtjes.
Rama zbuloi edhe një objektiv më ambicioz, duke deklaruar se Shqipëria synon të bëhet furnizuese edhe për ushtri aleate.
“Kemi marrëveshje me kolosë të industrisë ushtarake dhe mos u çudisni kur një ditë të vijmë përsëri këtu dhe të ekspozojmë produkte të prodhuara në Shqipëri që do t’ia japim edhe ushtrisë amerikane. Parafytyroni një ushtar të SHBA-së me një prodhim ‘made in Albania’. Kjo është Shqipëria tjetër që kemi ndërtuar dhe do të japë edhe më shumë rezultate”, deklaroi Rama.
