Kryetari i PD, Sali Berisha, ka akuzuar SPAK se nuk ka shpallur në kërkim ndërkombëtar Ermal Beqirin dhe Ergys Agasin, pavarësisht se sipas tij, urdhër-arrestet ndaj tyre mbanin datën 25 dhjetor 2025.
Në një konferencë për mediat nga selia blu, Berisha u ndal te arrestimi i Ermal Beqirit në Francë, duke deklaruar se ky rast, sipas tij, tregon “rrezikshmërinë e madhe që paraqet Shqipëria me krimin e organizuar për rajonin dhe Evropën”.
Berisha tha se më 24 prill 2026 kishte denoncuar publikisht faktin që Beqiri dhe Agasi nuk ishin shpallur në kërkim ndërkombëtar, edhe pse ndaj tyre ekzistonin masa arresti. Sipas tij, gjatë kësaj periudhe Ergys Agasi ka blerë dy avionë privatë në Austri dhe ka regjistruar njërin prej tyre, së bashku me biznesin e tij, në Slloveni.
“Kemi denoncuar se Agasi dhe Beqiri nuk ishin në kërkim ndërkombëtar, ndërkohë që urdhër-arresti për ta ishte i datës 25 dhjetor 2025. Katër muaj më vonë ata ende nuk ishin shpallur në kërkim”, deklaroi Berisha.
Kreu i demokratëve pretendoi gjithashtu se gjatë kësaj periudhe janë dokumentuar fluturime të avionëve në hapësirën e vendeve të NATO-s dhe Bashkimit Evropian, duke ngritur akuza për mënyrën se si është trajtuar çështja nga autoritetet shqiptare.
Berisha u shpreh se kjo situatë i ka dhënë mundësi Ergys Agasit të vijojë aktivitetet e tij, ndërsa për Ermal Beqirin tha se ai ka vepruar në disa vende të Bashkimit Evropian, përfshirë Austrinë, Slloveninë dhe Francën.
Më tej, kreu i PD-së akuzoi Ermal Beqirin se ka përfituar, sipas tij, të paktën 200 milionë euro nga Agjencia Kombëtare e Shoqërisë së Informacionit (AKSHI). Ai pretendoi se Beqiri është promovuar nga qeveria si një histori suksesi, ndërsa e cilësoi arrestimin e tij në Francë si një çështje me përmasa të rënda.
Berisha akuzoi gjithashtu kryeministrin Edi Rama, duke e cilësuar atë si drejtues të “mafies më të rrezikshme në Evropë” dhe pretendoi se institucionet ligjzbatuese nuk kanë vepruar për shkak të ndërhyrjeve politike.
