Ministri për Evropën dhe Punët e Jashtme, Ferit Hoxha, nuk e ka mohuar se Serbia ka kërkuar hapjen e një Konsullate të Përgjithshme në Shkodër. Përkundrazi, në reagimin e tij në rrjetin social X, ai konfirmon ekzistencën e kërkesës dhe lë të kuptohet se ajo po shqyrtohet në kuadër të parimit të reciprocitetit me kërkesën shqiptare për hapjen e një Konsullate të Përgjithshme në Luginën e Preshevës.
“Serbia, nga ana e saj, ka kërkuar hapjen e një Konsullate të Përgjithshme në Shkodër. Nëse dhe kur palët të bien dakord për çdo aspekt dhe detaj të këtij procesi, në momentin e duhur do të ndërmerren veprimet përkatëse”, shkruan Hoxha.
Deklarata sugjeron se dy çështjet po trajtohen si pjesë e të njëjtit proces negociues: Shqipëria synon të sigurojë një përfaqësi të përhershme konsullore në Luginën e Preshevës, ndërsa Serbia kërkon të njëjtin status në Shkodër.
Ministri e argumenton këtë qasje me parimin e reciprocitetit, duke theksuar se ai është një instrument i zakonshëm i marrëdhënieve diplomatike dhe se objektivi kryesor i Shqipërisë mbetet krijimi i një pranie konsullore pranë shqiptarëve të Luginës së Preshevës.
Reagimi i Hoxhës vjen pasi deklarata e ministrit të Jashtëm serb për hapjen e një konsullate në Shkodër shkaktoi debat publik. Në vend që ta përgënjeshtrojë këtë mundësi, ministri shqiptar konfirmon se kërkesa ekziston dhe se realizimi i saj do të varet nga arritja e një marrëveshjeje mes dy vendeve.
Kjo do të thotë se, të paktën sipas deklaratës zyrtare të Ministrisë së Jashtme, hapja e konsullatës shqiptare në Preshevë dhe asaj serbe në Shkodër po trajtohen në të njëjtën paketë negociuese, mbi bazën e reciprocitetit.
