Protestuesit kanë djegur karriget e vendosura nga kryeministri Edi Rama për dialog përpara godinës së Kryeministrisë, gjatë ditës së 13-të të revoltës studentore në Tiranë.
Menjëherë pas mbërritjes përpara selisë së qeverisë, protestuesit u kanë vënë flakën karrigeve që kryeministri vendos çdo mëngjes përpara zyrës së tij, si simbol i ftesës për dialog.
Përmes këtij veprimi, pjesëmarrësit kanë shprehur sërish refuzimin e dialogut me kreun e qeverisë, në një kohë kur protestat janë shoqëruar me tensione dhe akuza për dhunë policore.
Ndërkohë, protestuesit kanë vijuar thirrjet për dorëheqjen e Edi Ramës, duke e mbajtur këtë si kërkesën kryesore të tubimit.
Protesta përpara Kryeministrisë vjen pas grumbullimit të studentëve, të rinjve dhe qytetarëve te Ministria e Arsimit, ku më herët u regjistruan tensione dhe u hodhën gurë në drejtim të godinës.
