Policia e Shtetit ka pezulluar nga detyra një efektiv të Forcës së Posaçme “Shqiponja”, pas publikimit të pamjeve në media nga protesta e 24 tetorit në Tiranë.
Sipas njoftimit zyrtar, inspektori A. K. shfaqet në tejkalim të detyrës dhe në mosrespektim të parimit të proporcionalitetit. Ndaj tij, Drejtoria e Standardeve Profesionale ka nisur edhe hetimin administrativ.
Ndërkohë, janë hapur hetime për rastin e 28-vjeçarit E. V., i cili pësoi dëmtim në sy gjatë protestës. Drejtori i Përgjithshëm i Policisë ka urdhëruar hetimin e rrethanave nga Standardet Profesionale, ndërsa për rastin po hetojnë edhe Agjencia e Mbikëqyrjes Policore dhe Prokuroria.
Policia shprehu keqardhje për lëndimin e të riut dhe u uroi shërim të gjithë qytetarëve, gazetarëve dhe efektivëve të lënduar gjatë protestave.
Në të njëjtin reagim, Policia deklaroi se pesë punonjës të saj u plagosën gjatë përplasjeve. Sipas saj, efektivët u sulmuan me gurë, sende metalike, lëndë piroteknike, bomba Molotov dhe bombola gazi të lidhura me kapsolla.
Institucioni u zotua se çdo rast i dyshuar për tejkalim të detyrës do të hetohet me paanshmëri, duke theksuar detyrimin për respektimin e ligjit dhe proporcionalitetit në përdorimin e forcës.
