Erjon Vishkulli, që u plagos me plumb gome në sy nga forcat e policisë gjatë protestës kombëtare të studentëve mbrëmjen e kaluar, do të niset drejt Romës në orën 13:00 për një ndërhyrje të specializuar. 28-vjeçari i është nënshtruar një ndërhyrjeje, por plumbin e ka ende në sy. Ndaj pasiguria për humbjen e shikimit është shumë e madhe. Nga ana tjetër, AMP ka nisur hetimin për të identifikuar punonjësin e policisë që shkeli protokollin duke qëlluar protestuesin në pjesën e sipërme të trupit, gjë që është e ndaluar nga ligji. Erjon Vishkulli u plagos teksa ishte pjesë e protestës, por ai nuk rezulton në mesin e protestuesve të ketë kryer akte të dhunës.
