Protestat e ditëve të fundit në Tiranë kundër projektit të investimit në Zvërnec kanë shkaktuar një përplasje të pazakontë diplomatike mes Shqipërisë dhe Iranit. Debati u ndez pasi zëdhënësi i Ministrisë së Jashtme iraniane, Esmaeil Baqaei, publikoi në rrjetet sociale një video nga protesta, duke akuzuar kryeministrin Edi Rama se po shmang përgjegjësinë përballë zemërimit të qytetarëve shqiptarë.
Në reagimin e tij, Baqaei i kërkoi Ramës të dëgjojë thirrjet e protestuesve si “Jo korrupsionit”, “Duam drejtësi” dhe “Rama ik”, duke e akuzuar se po përdor Iranin si justifikim për kritikat që po përballet brenda vendit.
Kryeministri Rama reagoi menjëherë, duke deklaruar se “qeveria e ajatollahëve të Teheranit i është bashkuar zyrtarisht protestës”, ndërsa mbrojti të drejtën e qytetarëve për të protestuar në një sistem demokratik. Në një përgjigje të ashpër drejtuar Teheranit, Rama kujtoi sulmet kibernetike që Shqipëria ia atribuoi Iranit dhe që çuan në ndërprerjen e marrëdhënieve diplomatike mes dy vendeve.
“Shqipëria nuk merr leksione për sovranitetin nga një regjim që godet qytetarët e vet me censurë, frikësim dhe represion”, shkroi Rama, duke shtuar se protestat në Shqipëri janë shprehje e demokracisë dhe jo arsye për ndërhyrje nga një qeveri e huaj.
Përplasja kulmoi me cilësimin e Iranit nga ana e kryeministrit shqiptar si “një shtet terrorist sipas vetë përkufizimit”, duke e kthyer debatin për protestat në Tiranë në një çështje me jehonë ndërkombëtare.
