Një grup aktivistësh të shoqërisë civile kanë dorëzuar këtë të martë në Komisionin Qendror të Zgjedhjeve një kërkesë për t’u pajisur me formularin zyrtar që mundëson mbledhjen e firmave në mbështetje të një nisme për ndryshime në Kodin Zgjedhor.
Dokumenti, i datës së sotme dhe i vulosur me logon “Veprimi qytetar për demokraci funksionale”, mban firmat e 10 përfaqësuesve të shoqërisë civile.
Mes nënshkruesve të kërkesës është edhe ish-kreu i KQZ-së, Kristaq Kume, aktivistët Andi Tepelena, Edlira Çepani, Rezarta Caushaj, Edmond Çata, Etleva Merko, Gerta Meta, Ilir Aliaj, Rigels Xhemollari dhe Silvana Bello.
Në kërkesën drejtuar KQZ-së, iniciatorët bëjnë të ditur se procesi i mbledhjes së firmave do të zgjasë tre muaj nga momenti i miratimit të formularit tip.
“Periudha për mbledhjen e firmave të zgjedhësve, mbështetës të kësaj nisme ligjvënëse, do të jetë 3 muaj, nga data e vendimit tuaj për të na pajisur me fletën tip”, thuhet në dokument.
Nisma synon të sigurojë mbështetjen e nevojshme qytetare për paraqitjen e propozimeve për ndryshime në Kodin Zgjedhor, sipas procedurave të parashikuara në legjislacionin shqiptar.
