Një pjesë e protestuesve që po tubonin para Parlamentit është zhvendosur përpara ambienteve të Komisariatit nr. 4 në Tiranë. Ky veprim ka ardhur pas shoqërimit nga policia të disa personave gjatë mëngjesit të sotëm. Qytetarët e grumbulluar kanë bllokuar qarkullimin e automjeteve në rrugën pranë komisariatit dhe kanë bërë thirrje për lirimin e të shoqëruarve, ndërsa mbanin në duar pako me vezë.
Ndërkohë, pjesa tjetër e tubuesve ka vijuar të qëndrojë jashtë ambienteve të Kuvendit. Pasi kanë hedhur miell dhe vezë në drejtim të deputetëve që po hynin në seancë, protestuesit kanë nisur thirrjet në kor, duke kërkuar arrestimin e ish-zëvendëskryeministres Belinda Balluku me parullat “Arresto Ballukun!”.
Gjatë këtij tubimi, protestuesit kanë lëshuar thirrje edhe ndaj dy forcave kryesore politike në vend, duke thirrur në kor “PD-PS, këlyshë të komunizmit”. Situata ka vijuar e njëjtë në të dyja pikat, ku një pjesë e qytetarëve ka qëndruar para Parlamentit dhe pjesa tjetër para komisariatit.
