SPAK ka përfunduar hetimet për një nga fraksionet e dosjes “Plumbi i Artë”. Ndaj të shumëkërkuarve Festim Qoli dhe Talo Çela është ngritur akuza e vrasjes së Elvis Dedajt, krim i ndodhur në qershor të vitit 2012 te Shkëmbi i Kavajës. Dedaj ishte ortak në biznes me Festim Qolin dhe, në momentin që tentoi të ndante pronat e biznesit, Qoli urdhëroi vrasjen. Për këtë ngjarje po gjykohet ish-i penduari i drejtësisë, Henrik Hoxha.
Ndaj Qolit është ngritur gjithashtu akuza për vrasjen e Fatmira Dedajt, në shtator të vitit 2013. Fatmira Dedaj ishte nëna e Elvis Dedajt dhe, sipas hetimeve, Festim Qoli dhe grupi i tij e konsideronin si një shqetësim, pasi kërkonte drejtësi për të birin. Vrasjen e saj e ka zbardhur me detaje i penduari i drejtësisë, Nuredin Dumani.
