SPAK përfundoi hetimet dhe dorëzoi për gjykim dosjen penale ndaj 4 të pandehurve, dy prej të cilëve oficerë të policisë gjyqësore në Dibër, nën dyshimet për korrupsion e shpërdorim detyre, pasi kanë përfituar para për të lehtësuar pozitën e një të dyshuari për vrasje me dashje mbetur në tentativë.
Ish-oficeri i policisë gjyqësore Shuip Cami si dhe shtetasit Flamur Kurtit e Fluturim Bajrami akuzohen për veprën penale të korrupsionit, ndërsa ish-oficeri Aldo Puca akuzohet për shpërdorim detyre. Sipas SPAK në 9 janar 2020 në qytetin e Peshkopisë, Adrian Shahi dyshohej se kishte goditur disa herë me thikë në pjesë të ndryshme të trupit, bashkëfshatarin e tij, Bukurosh Zagradi.
Për këtë ngjarje, prokuroria e Dibrës ka regjistruar procedim penal ndaj Shahit, për akuzën e vrasjes me dashje mbetur në tentativë.
“Rezulton e provuar se i pandehuri, Shuip Cami, në cilësinë e oficerit të policisë gjyqësore të Komisariatit të Policisë, Dibër, njëkohësisht oficeri që ka kryer veprimet e para dhe ka referuar cështjen penale në Prokurori, i ka kërkuar dhe marrë të pandehurit, Flamur Kurti (i njohur i shtetasit Adrian Shahi) shumën monetare prej 3,000 (tre mijë) euro në këmbim të premtimit të dhënë për favorizimin e pozitës procedurale të shtetasit, Adrian Shahi në çështjen penale në ngarkim të këtij të fundit”, thekson SPAK.
Ndërkohë, i pandehuri Fluturim Bajrami, lidhje krushqie e Adrian Shahi, nga hetimet ka rezultuar se i ka dhënë të ndjerit, Qemal Vranezi, në cilësinë e Specialistit të Policisë, SPZ pranë Komisariatit të Policisë, Dibër, shumën prej 2000 eurosh në mënyrë, që të bëhej i mundur pajtimi mes Adrian Shahut dhe Bukurosh Zagradit, duke u favorizuar në këtë mënyrë autorin e ngjarjes.
Oficeri i policisë gjyqësore Aldo Puca, I ngarkuar me hetimin e çështjes penale në ngarkim të shtetasit, Adrian Shahi si edhe me ndjekjen e përgjimeve të komunikimeve, edhe pse ka qenë në dijeni të komunikimeve telefonike, me përmbajtje korruptive, mes kolegut të tij, Cami dhe të pandehurve të tjerë, në shpërdorim te detyrës nuk e ka referuar rastin menjëherë. Puca e ka referuar ngjarjen dy vite me vonë – thotë SPAK – dhe jo me iniciativën e tij, në përmbushje të detyrës së tij ligjore por vetëm pasi viktima e veprës penale, Bukurosh Zagradi ka shprehur pakënaqësi për këtë fakt të kundërligjshëm në Gjykatën e Dibrës.
